ياندم هونك علينه
دروس والعبره الجروح
والي مايكتل يقوي
وبعد بينه شما وكعنه
تنبض بشرهه العواطف
تكول ميموت العشك
لو بينه روح
اولوم يانصح الشماته
مايفيد العتب
لو صاب الخدش خد العروس
يلي شديت النظر
نزوة عمه
وختيله تلعب
كصدك ابلب الجبد
عمدن تدوس
ولاتبوس
ولاتبوس
لاتبوس اجفوف ترفه
وانته بشفافك
اثر عضة غدر
بحجة الولهان
والتمثيل عالشاريك بالجلمات حرفه
تعيش لحظات الضعف
نشوه وغرور
وتعبر بثوب المسافر
والدرب يدري بخطوتك
تنتهي ابغمزة محطه
اتاني ليل
اتاني تايه
تنتظر هميان جنطه
محمله بصرعة صفاتك
تذوب بيهه
ومن تعود بختم
لو تأشيره مره
انطبعت ابدفتر حياتك
تنسه لوحة ذكرياتك
بيد هاوي
ايقلد الرواد ويحنجل جذب
ويمكن ايدور غلب
بينك وبينه بشراسه
تبرز اوجوه التشابه
وهم اظن يطلع عرف
تنذبح بيدك وبيده
قيم تحصيل الهويه
والصدك يصبح ضحيه
وتنتفض دنيا الوفاء
ابلافته وصرخت تظلم
المحنه تصيح بالغش تيهوني
وليش كل هذا التظرع والبحث
مرايتك عدهه الاجابه
وبالانابه
وبضميرك شوف ياهو
الاكثر ابروحك يحثك
واقع ادموع الحبايب
لو وهم حبر الخواطر
ولا تكابر ---لا تكابر
دير بالك لاتكابر
من ينام ابزعل سلطان المشاعر
ايصبح الكابوس شاطر
والطيور تموت سكته
وينتحر لون البنفسج والخظار
ابجنح فراشات تستوطن الغربه
اتعاهدت ويه الشواطي
وردت ابلهفة امومه
وظنت الوديان عذبه
وهاجرت ماعدهه حيله
ويتمت ورد الخميله
وأيست ينصفهه راوي
لو تدونه ابقصيده احروف شاعر
:::::::::::::::::
منقوووووووووووول للامانه الشعريه
» شعر
» والدي الحبيب
» ابوذيات للحلوين
» دارمي يموت
» ترحيب
» ابو ذية
» فضل قراءة قل هو الله احد في ايام رجب
» بمناسبت قرب عيد رمضان المبارك
» انه بدونك طفل
» ابتسم
» غضل قراءة قل هو الله احد في ايام رجي
» شجرة دارمي كوم
» دارمي وقصته الحزينه..
» عضو جديد