دارمي كوم

حبيبي الزائر الغالي العزيز
اهلا وسهلا بيك صارت قديمة نفرشلك العينين والرمش خيمة
تبين انك غير مسجل في سجلاتنا....لاتدوخ رجاءا التسجيل السريع لايكلفك سوى دقيقة واحدة
استمتع معنا وشاهد الاقسام الخفية الممتعة....اقرا ما تشاء واكتب ما تشاء...فالمنتدى منكم واليكم..مع التقدير.
اخوكم رعد الاسدي
دارمي كوم

دارمي/ابوذية/موال/شعر/شعبي/قصائد/قصص/شعر فصيح/خواطر/ /نكات

انت الزائر رقم

ادعمونا في الفيسبوك

ساهم في نشرنا في الفيسبوك

المواضيع الأخيرة

»  دارمي اعجبني
الجمعة مارس 25, 2016 9:41 pm من طرف احمد جابر

» دارمي يموت
الأحد مارس 13, 2016 2:19 pm من طرف احمد اعناج

» ترحيب
الأربعاء يناير 20, 2016 4:16 am من طرف جاسم

» فضل قراءة قل هو الله احد في ايام رجب
الأحد نوفمبر 29, 2015 9:02 pm من طرف الملکة

» بمناسبت قرب عيد رمضان المبارك
الجمعة يوليو 17, 2015 3:34 am من طرف ابوسيف العويسي

» انه بدونك طفل
الإثنين مايو 25, 2015 7:02 am من طرف شاعرة الحنين

» ابتسم
الأحد مايو 17, 2015 4:11 am من طرف كاظم موسى قسام

» غضل قراءة قل هو الله احد في ايام رجي
الأحد مايو 17, 2015 4:00 am من طرف كاظم موسى قسام

» شجرة دارمي كوم
الأربعاء مايو 13, 2015 6:31 pm من طرف abbaslife1

» دارمي وقصته الحزينه..
الأربعاء مارس 04, 2015 11:10 am من طرف احمد اعناج

» عضو جديد
السبت ديسمبر 27, 2014 11:55 pm من طرف الكفاري

» صوت الظليمه ((كعده))
الأربعاء نوفمبر 26, 2014 8:13 pm من طرف خالد محمد مهدي الحجار

» رجوع السبايا (( أربعينيَّه))
الإثنين نوفمبر 24, 2014 1:19 pm من طرف خالد محمد مهدي الحجار

» مجلس لزيد الشهيد عليه السلام
الأحد نوفمبر 23, 2014 5:32 pm من طرف خالد محمد مهدي الحجار

» ردّينه ردّينه يبن أمي ردّينه
الأحد نوفمبر 23, 2014 1:32 pm من طرف خالد محمد مهدي الحجار

أفضل 10 أعضاء في هذا الأسبوع

أفضل 10 أعضاء في هذا الشهر

أفضل 10 أعضاء في هذا المنتدى

بلاد الزوار

free counters

اجمل ما قيل في الحب

اجمل ما قيل في الحب

    موسوعة دارمي

    شاطر

    ابوسيف العويسي
    عضو مجلس ادارة
    عضو مجلس ادارة

    ذكر
    عدد الرسائل : 5588
    العمر : 46
    العمل/الترفيه : شاعر شعبي
    المزاج : ترف ومتفائل
    الطاقة :
    70 / 10070 / 100

    الجنسية : عراقي ابن بابل
    تاريخ التسجيل : 16/08/2010

    موسوعة دارمي

    مُساهمة من طرف ابوسيف العويسي في الإثنين ديسمبر 26, 2011 11:08 pm

    =============
    لاتگطع اترجاك
    سمعني كلمة
    والله الهوه بلياك
    مايسوه اشمه
    ==============
    لاتظن يوم انساك
    يالمني بيه
    ماي انته ومباريك
    بثنين اديه
    ===========
    سهران افكر بيك
    ماشايف النوم
    وتخيلت مرسوم
    وجهك بالنجوم
    =============
    ينراد اخلي اعيون
    بعيوني ذني
    حته اگدر ابچي اعليك
    من تمشي عني
    ================
    هدني التعب يفلان
    والهم أكلني
    من غيبتك لليوم
    محد فگدني
    ================
    نمت آنه عالتبريد
    حسبالي أغفه
    نار المحب بحشاي
    ماترضه تطفه
    ==============
    أصفن واعد انجوم
    وايدي اعله خدي
    هم غربة هم افراگـ
    هم ولفي ضدي
    ==============
    للدوم اظل وياك
    يالطيبك ايفوح
    ولخوتك ماعوف
    لو تطلع الروح
    ==============
    غيرة وكرم واخلاص
    كلهن صفاتك
    واتعب شوصف بيك
    يالطيبة ذاتك
    ==============
    صدگني آنه اوياك
    روح بوسط روح
    گبلك أحس بالآه
    لو إنته مجروح
    ==============
    تدري شوكت أنساك
    وبگلبي اتهون
    من تسمع آنه اهناك
    بالنجف مدفون
    ==============
    حسبالك آنه انساك
    يالتسوه كلشي
    تسوه العدل والمات
    والتوه يمشي
    ==============
    عبوة وزرعني الشوگـ
    صرت اعله دربك
    واعذرني لو طگيت
    فجرني حبك
    ==============
    تدري شوكت أنساك
    ياأغله الاحباب
    لمن يجيني الموت
    واتغطه بتراب
    ==============
    لعيونك الحلوات
    صدگني أشتاگـ
    ماأصبر بلياك
    واتحمل افراگـ
    ==============
    كون الجمال البيك
    أتمنه بيه
    حته آنه من اشتاگـ
    أصفن عليه
    ==============
    غالي وعزيز اهواي
    وفراگك اهموم
    وعيوني لو تنساك
    أعميها للدوم
    ==============
    حاير شحط للعين
    وامنعها منكم
    صبح وعصر وغروب
    تسألني عنكم
    ==============
    عيون البشر حلوات
    بس عينك احله
    خظرة وتسلب اعقول
    لو تحط كحله
    =============
    ظلمة وتريد الناس
    توصل للبيوت
    بس آنه اريد الگاك
    هالساعة لو موت
    ==============
    گالولي اجاك العيد
    چا ليمته اتهيد
    عيد اليمر بجفاك
    ماينحسب عيد
    ==============
    تدري آنه گبل العيد
    عاشورك اوياي
    حاسمها لو مو عيد
    ماتضحك اشفاي
    ==============
    يم بيتي بيتك كون
    واشمرلك العين
    تشبعها منك شوف
    وتردها بعدين
    ==============
    صايم على فرگاك
    غيرك فلا اريد
    أفطر أنه بملگاك
    وك شوفتك عيد
    ==============
    أتعارك اويه النوم
    بلكي اغفه وانساك
    تاليها صورة وصوت
    إبحلمي الگاك
    ==============
    باخر نفس مخنوگـ
    واتمنه اشوفك
    واعذرني بس الموت
    يجبرني اعوفك
    ==============
    نامت اگلوب الناس
    بس گلبي گاعد
    والضغط من فرگاك
    كل ساعة صاعد
    ==============
    للموت اضل وياك
    ماابدل الراي
    وافدي الجسد والروح
    لليوفي وياي
    ==============
    بالگلب ساكن دوم
    مايمكن انساك
    يهجرني حته النوم
    من يمر ذكراك
    ==============
    إرهابي ليش اصير
    مو إنته حباب
    فجرت گلبي اشبيك
    سويته عطاب
    ==============
    الخوة شحت حيل
    صارت قليلة
    لكن وحگ عيناك
    خوتنه اصيلة
    ==============
    ليل وشتى وبردان
    ماتدري حگك
    ماأدفى حته بنار
    أدفه امن اشبگك
    ==============
    أصفن واحاچي الروح
    وين احنه چنه
    هم ترجع الأيام
    ويلتم شملنه
    ==============
    ناذر نذر لو جيت
    وتشوفك العين
    أگعد أجدي اسبوع
    اباب الحسين
    ==============
    سيطرة بدرب اهواي
    وهمية أنصب
    حته امن اشوفه ايفوت
    أخطفه وأهرب
    ==============
    شريان الك بالروح
    يمشي بغزارة
    وحبك بگلبي دوم
    ماتطفه ناره
    ==============
    مل مني حته الليل
    والگمر شاهد
    بس بيك افكر دوم
    للفجر گاعد
    ==============
    مذنب أظل بهواك
    كون انته قاضي
    تحكمني بالإعدام
    صدگني راضي
    ==============
    اتريله الك بوسات
    تحملها العيون
    حضر خمس عمال
    بس اليفرغون
    ==============
    أخطب بنص الناس
    والساحة تشهد
    وافرض حضر تجوال
    لو غثك احد
    ==============
    صدگوني مامرتاح
    يالروحي عدكم
    لو أدري هيچ اشتاگـ
    ماعاشرتكم
    ==============
    الروح اذا تنساك
    ميتة اعتبرها
    وبيسرتي ويمناي
    أحفر گبرها
    ==============
    مسكنك روح الروح
    ياشمعة العين
    ومن كل خطر يحميك
    مولاي الحسين
    ==============
    للصحبة أهدي الروح
    وعيوني الاثنين
    والعمر فدوة ايروح
    للصاحب الزين
    ==============
    دايخ وافكر بيك
    وعن بالي متروح
    أمشي وردمني الباب
    حسبالي مفتوح
    ==============
    صابر على فرگاك
    گلبي اليريدك
    والصبر يالمحبوب
    مفتاحه بيدك
    ==============
    لاتسأل اعله الحال
    خليها سكتة
    تسأل على المكتول
    والكاتل انته
    ==============
    لو ممشة عشر اسنين
    أمشيها واكثر
    ماأتعب وماجوز
    من حب الاسمر
    ==============
    روحي بسرير الموت
    تنشدني عنك
    وتگلي ليش اهواك
    متبري منك
    ==============
    يالبلگلب مشتول
    وبروحي مزروع
    افراشك النبضات
    وغطاك الظلوع
    ==============
    ياجوري يانعناع
    يانبع صافي
    لاخر نفس بالروح
    ليك ابقه وافي
    ==============
    غير الوفه يهواي
    ماعندي غاية
    وآنه اعله عهدي اوياك
    حد النهاية
    ==============
    كون الفرح ينباع
    واشريلك العيد
    يالشوفتك عيدين
    عيد احله من عيد
    ==============
    أسأل أضل اعليك
    حد گطع الانفاس
    غالي وتضل بالروح
    تاج انته عالراس
    ==============
    تبقه انته تاج الراس
    تبقه انته راقي
    يالريحتك بغداد
    واسمك عراقي
    ==============
    كون الحبيب ايصير
    بالحمزة دنگة
    وبحجة الزوار
    كل ساعة اشبگة
    ==============
    صح البشر حلوين
    بس الك ميزة
    تدخل گلب تهريب
    وبليه فيزة
    ==============
    أتمنه هالطلاب
    كلهم ينجحون
    چيفن حبيب الروح
    ويه اليدرسون
    ==============
    گتلك تفضل فوت
    كل قصدي للبيت
    رأسا دفعت الباب
    وبگلبي طبيت
    ==============
    تمثال الك بالعين
    شايلته الجفون
    نافورة منه وبيه
    دمعات العيون
    ==============
    من غبتوا ولهاليوم
    أحلامي بيكم
    وصدگوا مثل هوار
    أبچي عليكم
    ==============
    ظلمة ودرب عاثور
    والدنيه تمطر
    لغيرك فلا تانيت
    بس الك أنطر
    ==============
    طيفك نبض بالعين
    كل ليلة ضيفي
    بعيونك الحلوات
    هم يمر طيفي
    ==============
    أهلا وسهلا بيك
    صارت قديمة
    أفرشلك العينين
    والگلب خيمة
    ==============
    اشما تگول الناس
    عندي انته الاول
    سو كلشي بالدلال
    ياحلو مخول
    ==============
    دم الگلب بجفاك
    فاض من العيون
    مو حب طبيعي اهواك
    بيك آنه مجنون
    ==============
    أنشد عليك الروح
    مدري اشتگلي
    مدري انته نص الروح
    مدري انته كلي
    ==============
    لاتظن يوم انساك
    لو يوم اعوفك
    صدگني ابيع الروح
    بس كون اشوفك
    ==============
    كون المحبة اصير
    مثل السياسة
    حته اليخون ابساع
    ينگطع راسه
    ==============
    كلمن يگول انساك
    گله انته مجنون
    هو الگمر ينشاف
    من غير العيون
    ==============
    كلمن ينام الليل
    مايعرف ايحب
    آنه بحلات النوم
    وعيوني اتصب
    ==============
    لو گلبي عافك يوم
    سويته تكه
    وللمكتب استدعاء
    بالبطة اصكه
    ==============
    يهتز يريد ايطيح
    گلبي اعله فرگاك
    لايرضه جرحي ايطيب
    لايرضه ينساك
    ==============
    دورت بالصفنات
    وحده انته منهن
    لمن صفنت النوب
    صرت انته كلهن
    ==============
    دورت كل الناس
    ماكوا بحلاتك
    والعسل كله ايروح
    فدوة لصفاتك
    ==============
    ريت الأصابع هاي
    إيصيرن اشموع
    مشعولة لجلك دوم
    للأبد متموع
    ==============
    حط حرس حط اسلاح
    حط قوة يمك
    لازم أجيك اليوم
    أوصل واشمك
    ==============
    الصحبة صحبة موت
    لتظن اعوفك
    ماتدري آنه اشلون
    مشتاگـ اشوفك
    ==============
    كون انگلب صمون
    واسكن فرنكم
    وكل ماتمسني النار
    أصرخ أحبكم
    ==============
    بالحلم شفتك طيف
    چذبت العيون
    نايم وافكر بيك
    من اگعد اشلون
    ==============
    كلمن يگول انساك
    صدگني چذاب
    حبك جرح بالروح
    ينزف ولاطاب
    ==============
    الدهر لو وازاك
    خذلك معلمة
    جيبك تترسه افلوس
    وابنك تعلمه
    ==============


    _________________




    سام
    عضو فضي
    عضو فضي

    ذكر
    عدد الرسائل : 240
    العمر : 23
    المزاج : معتدل
    الطاقة :
    0 / 1000 / 100

    الجنسية : انا عراقي
    تاريخ التسجيل : 31/07/2011

    رد: موسوعة دارمي

    مُساهمة من طرف سام في الإثنين ديسمبر 26, 2011 11:47 pm

    عاشت ايدك عمي
    درامي خرافي تقبل أ راق تحياتي
    _______________________

    ابوسيف العويسي
    عضو مجلس ادارة
    عضو مجلس ادارة

    ذكر
    عدد الرسائل : 5588
    العمر : 46
    العمل/الترفيه : شاعر شعبي
    المزاج : ترف ومتفائل
    الطاقة :
    70 / 10070 / 100

    الجنسية : عراقي ابن بابل
    تاريخ التسجيل : 16/08/2010

    رد: موسوعة دارمي

    مُساهمة من طرف ابوسيف العويسي في الأحد يناير 01, 2012 11:43 am

    شكرا الغالي اسير الروح
    على مروك الرائع



    _________________




      الوقت/التاريخ الآن هو الخميس ديسمبر 08, 2016 3:50 pm