خيانة

من اجيتي وايدة بايدج
الله ماخفتي يسطرج
يكسر ايدج؟؟

كبل خمس سنين كلتي
اشون اعوفك!
اني اعوفك!
الله يكسر ايدي اذا عافت جفوفك
هسة ربي شلون بيه
جذبت بيك ونستني
والجذب لايك عليها!!
ربي خمس سنين مرت
ليش ماكاسر اديهة!!!

ادري ليش ؟؟
وجذب كل اشكال بيهة
صوج كلبي الكلب ماعنده خطية
يفرع ويدعي عليهة
ومن اجيتي وايدة بايدج
وانتي شفتيني اباوع
صار وجهي هلال عيدج
وهذا اول عيد من يوم العيونج فاركتني
هسة اجيتي؟؟

وصرنة عين بعين لحظة
وشفتج كابلت شفتي
لاعيونج عبرتني
بالجذب ماعايدتني


ومن اجيتي وايدة بايدج
انطيتي عيدية ضحكتج
وجنتي ذاك العيد احسن
ع الاقل وحدج اجيتي

وجنت اشوفج جنتي
واذكرج من عايديتي
كل عام وانت عايش وحدك
كل عام وانت تكضيهة صبر
كل عام وانت كوم جروح عندك
ان شاالله تنسى الغدر

عيدك مفارك لهفتي
ارد اعزمك ياحبيبي
اليوم موعد حنتي
وباجر الزفة واريدك تنسعد
حتى ماارجع بعد