آه ياليلة السابع // شهر الاحزان
****************
سيف رايه وجف عنيده بيهن العباس وصفه
الخوَّه معناهه عرفنه وفه بعهده وزوده كفَّه
نذر روحـــه للعطاشـــــــه مايرد بغيره جفَّه
الحـادي والساقـــي وفاءه بيمنته طوَّع الكلفه
****************
أمأمنَّـه بجفَّـه العقيلـه الكربلــــــه كَصدت أبّختــــــــه
رايته صارت خدرهه روحه صارت ستر لختــــــــه
جفوفه خيمه بفيهه تكّعد يكَلهه أبويه آني وعدتـــــــــه
بأيدي لارض الطف أوصلج الخوف عمري ماعرفته
الماي لخيامج أجيبه // جفوفي نهران
****************
ودَّع الحرَّه بدمعهه وعينهه تنظر الرايــه
الامل برجوعه يكبريجيب للعطشان مايه
لاجن أتأخر عليهه وبعد مارجعت الآيـــه
بلا جفوف الكاع شابك الشهاده أله غايـــه
أنصاب راسه وطفوا عينه // موعده حان
******************
بجوده حاضنهه الشريعه ومله ماي الفرحه بيده
ضحَّه جفَّين أعله موده هاي لحظاتـــــه السعيده
وفَّه لجل الخوَّه روحه ومن حضر يمَّه عضيده
كَلَّـــه خلّينـــي بمكانـــي مطلبـــي وهذا الأريده
مستحي من سكنه أثاري // وعده ماخان
***************
الماي بين جفوفه يجري وكطره مالاحت شفافه
أتذكّــر أطفالــه العطاشــه وحمل انـواع الكلآفه
ملحمه سطَّــر مجدهه وبيــه ألــه دور الشـرافه
باب لحسين الكرامه بصحنه وكَفات الضيافــــه
مايخيب الدخل عنده // ضيفه ربحان
****************
آه ياليلة الثامن // شهرالاحزان
**************
شموع تبجي تذوب حسره ترسم اعله الحنَّه دمعه
دمعـه فوك الدمعـه عالخـد للفـرح ترســـم الشمعه
مهاجـــراليـوم الوديعــه ماألـه الخيمكَـه رجعـــــه
بقت رملــه بكَلب دامي حتَّــه مالحكَت تودعــــــه
وخيمته بالظلمه ظلَّت // صفت صيوان
****************
سنين من العمر تخلص لوعه وآهات ومصايب
العجيبـــــــه الدنيــــــه بيهه دابهه داب الحبايب
حصَّـــة الشــبّان منهه ذبــح بســيوف الحرايب
الفرح ثوبــه صــارأسود أتبيع والشرّاي راغب
منهه نشري الهم والونين //بلآيه نسيان
***************
عهد من الحسن عنده حافظ عليـــــه أبأراده
ينسه دنيه الهم يسافرعلــــه جناحين السعاده
يوم طف حسين عمَّه أيسجّل بسجل الشهاده
وعرسه بالجنَّه وزفافه عله ابو اليمَّه اعتماده
أتوَّج بدم الفضيله // ربح لجنان
****************
رمله من شافت ولدهه أتخضَّب بدم المنيَّــــــــه
شموع تضوي وطوس حنَّه العرس ماتم المسيَّه
حقهه من تحلم ببنهه وبوســه فوك الخــد هديَّــه
زينـــة الشــبان مبعــد أتغطَّـــه بتراب الوطيَّـــه
ظل كَلبهه يلوج حسره // هموم مليان
**************
حقهه أم يصعب عليهه تفارك أنواره وجماله
أمقدّره عليه المآسي بدمع عين تشوف حالــه
جم جرح جسمه حملهن تكَعد تلم بوصالــــــه
من عمرهه الربه ضايع غابت أيامه ودلالـــه
فاكَده أمكَدره بهمهه // وحيل نحلآن
» شعر
» والدي الحبيب
» ابوذيات للحلوين
» دارمي يموت
» ترحيب
» ابو ذية
» فضل قراءة قل هو الله احد في ايام رجب
» بمناسبت قرب عيد رمضان المبارك
» انه بدونك طفل
» ابتسم
» غضل قراءة قل هو الله احد في ايام رجي
» شجرة دارمي كوم
» دارمي وقصته الحزينه..
» عضو جديد