دارميـــــــــــــــــــــــــــــــــــــــــــــات

b]اهدي لكم هذة المجموعة من الدارميات اتمنى ان تنال اعجابكم

وللامانة هي منقوله من بعض المواقع العربية المختلفة لايتسع المجال لذكرها

فليحولوننا ويوهبونا ومن الله التوفيق



لاتهتم على الراح وي همك الراح
والعالي مو بالطول بالصبر ينلاح


اشمالك يبعد الروح لونك تغــير
عندي خوات أهواي طب أوتخير


يسألني البطران حالك إشلونــه
الغاضب الله إعليه هم ينشدوونـه


جاشلي بالخوان والماينفعـــــون
عود أمن اموت أيجون ويا اليشيعون


عبالي طيب زاد واعطيتك اعيون
تالي توج النار ويا اليكرهـــون


هاك أبره , هاك الخيط خويـه أرد أكلفـك
أمسرد الدلال شــله إعلى عـرفــــك



هـاك أبرتك. .و الخيـط خويــه إمش عنــي
لو بـيـــه أشل إجروح .. جان أشل ذنــي



علمني عالنسيان ارد انسى ضيمـــــك
وي غيري قمره اتصير بس حصتي ضيمك


سبحان امن خلاك تقسي ابغرامك
جانك اتداوي اجروح رقت كلامك


اوقف يبعد الروح اوياك الحســـاب
سَافر أو جرحي اينوح ليهسى ماطاب


هامسى أوها مصباح باجر يشيلـون
اورجليا شالت طيب من دمع العيون


الدنيا بس وياي شـدت عـــداوه
ولا واحد إمن الناس لجروحي داوه


ارد انشد الصباغ هم يصبغ اقــلوب
اصبغ دليلي اعليك واحزن فرد نوب


حـط باللبن تيــزاب مجبـور أشربـه
بس لا أشوفك يوم تمشي وي غربـــه



سباحه لك بالروح خضرى أوطريه
تسقيها من تشتاق وتمر علــــيه


ياماخذين الولف اوليفي وريد أويـاه
مانام لليل الشتى أومقدر على فرقاه


الدنيا ماتسواش لاتصفن إلهـا
عالطيب والمزيون يكثر حملها


يسألني البطران ليش وجهك اصفر
مايدري على المحبوب قلبي تفطر


يسألني البطران ليش راسك اقرع
مايدري على الحلوين شعري تشلع


يسألني البطران تشرب عرق ليش
هم سقم هم فراق هم لوعة الجيش


يسألني البطران اعربلي كان
حسباله مثل العام عقلي بمكانة


هاك استكانة جاي أشرب عوافــي
أو دزيته لك مخصوص يامايه صافي



رش الدرب تيــزاب حافي أعتـني لـك
جا شـلي بالرجليـن الما تجي لــــك



لو ترش مو تيــزاب لو تزرع ألغــام
اللحم خلـه إيروح أوصلـــك إعظـام



كل ما يجي الليل أذكر وفــــاكم
واذكر محاشي الطيب وابجي أبرهاكم



ويا النجم سهران وايدي أعلى خــدي
الليل أوظلام الليل شو كلها ضـــدي




وحدي ابنص الليل بس حيرتي أوياي
أبجي أعلى وقت الراح واتنطر الجاي




إشما تقول الناس عندي أنته لول
سو كلشي بالدلال يالحلو مخـول




يالتون تالي الليل سمعني حسك
لولا القلت والقال لعبر وونسك



شحجي وتريد الناس من عندي أحجـي
دمعتي إبطرف العين بس أحجي أبجـي



للخوه ماقضيت شي ماقضيته
حتى الصخر ياناس وتوسديته



انت العطش والماي وانت المشوفـه
ورسمش وحق عيناش بالكاس اشوفه


أرد انشدك وارجوك صارحني ياهواي
تذكرني لوغصيت من تشرب المــاي


نارك يخايب ماي مومثل نـــاري
اومن يطري بيا الشوق يحترق جاري


هم حلو .. وهم إزغيــر .. هم أزرك عيون
بس بيه طبع مو زين من يوعد إيخــــون



بالك تقول الاه ياخويا بـــالك
كل التقوله ايصير روحي ابدالك


مبخوت أضل للشيب يافلان أذكـرك
أوينكرني نور العين من كون أنكرك


سبحانه من سـواك نص وجهك إعيــون
إزغيــر سبيــت الناس من تكبر شلون



بيدي أوقرضها الفار فجت عباتي
كل هذا ماطخيت وامشي ابرهاتي


أتمنى كون أيصير لحدي أويا لحدك
أو من يطلع الدفان أقعد وقعـــدك


بيدك ضيعت ديك الليـــالي
وبلحظه ما أجى أبعينك دلالي


شقيت ثوبي أعليك وصلته للنــص
جاوين قلبك أوياي صاير مثل جص


الدنيا بس أوياي صارت حريصـه
أو من سلة المكتوم تطلع لي شيصه


همي الليالي اتعود واتعاتب أوياك
احجايه للشمات خلاني فرقــاك


سـلـم ولَو بالعين تكفي الإشــــاره
روحي إبتلت بهواك .. سـويلي جـاره



أرد اسأل العراف واهل القوافـي
ليش الحجاب إيلوق للوجه صافي



شفت الضوه إمن إبعـيد كًًلت إحتركًًنه
لمـن وصلت البيت لن ولفي عدنــه



شمـاتي مو شـمات شمـاتي شمات
بالكًًبر ويسألـون حي بعده لو مـات



شمـاتي مو شمـات شمــاتي إخـوتي
حتى أمي يا هالناس تدعي إعله موتـي



شماتي موشمات شماتي خوتـي
حته امي ياهل ناس تتمنه موتي


شماتي موشمات شماتي اشرار
بالكبر ويقولون ياربي بالنـار


شماتي موشمات شماتي ورطــه
نصهم امن واجرام والباقي شرطه


شمـاتي مو شمـات شماتي تسعه
والعاشر إزغيرون يأشر باصبعـه



حطيتك بسرداب وفوقه متر صـب
اصبح الواشي وياك من ياكتر طب


وينه اليخَيـطْ العين ويفكني منهـــا
كل ما تصد للدار يكثر حزنــــها



لو غبت عني الروح احسبها شده
واحرق ابدمع العين حتى المخده


بالك تمر بالدار عنها أشمر ابعــيد
دار العزيز اهواي نوح أوبجي اتريد


عمده ارد امر بالدار والنوح ازيده
واسمع صداها يقول راح التريده


عمده ارد امر بالدار واشبع مغمه
والمعتني الطيبات لوطاح شيهمه


غصبن عليها الروح جابتني اشوفك
كفر عليها للوم بلجن تعوفــــك


ظلمى اوذرب عاثور لليلة شتى أوعت
روحي اشتهت ملقاه عتتني لك عــت