أبوذيات روعة كلش

شلونكم أصدقائي حبيت أهديكم مجموعة من الابوذيات منقولة ويا ربي تعجبكم وتحياتي الكم
غيابك فتت المهجة وسلها
وسهم هجرك مرد روحي وسلها
نجوم الليل حلفها وسلها
حرام النوم عكبك مر عليه

أدك عليك يكول الطلب جاري
وعليك الدمع فوك الوجن جاري
ريتك ياالعزيز تصير جاري
وأشوفك كل صباح وكل مسية

سهول الناس عندي وانت راسي
سفن غركت بحري وانت راسي
حبيبي انت وصديقي وتاج راسي
وسري أكوله الك وأضمه عليه

أحبه وماأحب واحد بداله
وياذنب البده مني وبداله
الك منصوب بكلبي بدالة
خطك عاالنبض يشتغل بيه

يصاحب طال هجرك مر علينه
والزاد بعدك مر علينه
اذا بعدك تحبنه مر علينه
مر وأجرة التكسي عليه

أزعل منك وأدير الوجه طبعا
وصورة عيونك باالكلب طبعن
حلو وتخبل بس بيك طبعن
تشك وتغار من روحك عليه

وحق من تعبده الناس وحده
حبك سكن بالروح وحده
هذني اثنين وانت اختار وحده
ترحل لو تظل محبوب اليه

سيف حبك نبت بحشاي سنتين
حسبالهم كضيت وياك سنتين
أبشرك بقى برصيدي سنتين
داتصل ياحلو وخابر عليه

صحيح بعيد بس كلبي شعر بيك
حزين وظليت أكتب شعر بيك
عجيبة شلون ظل أسود شعر بيك
وأنا بفركاك ماظل شعر بيه

أحبك يابو شامة والوجه دوار
وأنا كلبي عليك من الصغر دوار
لأعوف الغنى وأشتغل دوار
أدور عليك أنا صبح ومسية

علميني الصبر عالحلوين يمامه
وكلبي من الهجر تعبني يامه يامه
كون عندي عيون زرقاء اليمامه
وأشوفك وين يالمبعد عليه

عزيزانت والك بالكلب منصب
ودمع العين من فركاك منصب
عسى موتي قريب وقبري من صب
ولا أسمع خبر عنكم أذية