ا(عبدت)حبك صنم ودري الله موجود عفت الله شجاني وحبك اعبدته
بس (شيطان )حبي شاد حيلين ادري ابروحي اطيحن لون ماطلته
بس (شيطان )حبي شاد حيلين ادري ابروحي اطيحن لون ماطلته
اشگد عانت زليخه ابعشگ يوزر سيف مومثلي العشگ والشوگ شايلته
اذا ضحت زليخه بلحسن والمال منو مثلي اليضحي ابچــتل عايلته
شنهي المال عندي والحسن والجاه متعجبه زليخه اتگول خاسرته
اخسرت كل ذني انا ول اطم من هاي انتحرت ومامتت بس عمري موته
اضحك عل الحبايب من يصورون ويضمون الصور عل الوادم ابسكته
ماصوره الحبيبي الكاغد ايروح انحرگ ريته المصور بعد وشرطته
كامرت الحجر ماريدن اتشوف نسبة سر جماله وقدر منزلته
كامرت المصور تفرق اهواي مومثلي المصور عقل كامرته
لعبت ابروحي طنب حتى اراويك منضر للصور وبروحي رتبته
الورد اوردتي صارت والنهر دمعات وكبد روحي سكملي وگلبي زغرفته
افرشت رياتي فرشه والمرايا العين وبنص الگلب بلتاجي كعدته
اشعلت افلاش روحي والاضاه الشوگ وبكامرة مخي ابدقه صورته
ماحمضه ابحبر فلم العشگ بيك من دمي حبيبي الفلم حمضته
وشلت حبك شليف وكاره نعناع وحط باگـه اعله باگــه وبيدي چـــورته
من تذبل ارشلك دمع العيون ونزع ثوب گلبي وبيك دثرته
يگلب ماي شوگك ادري بيه حار صكيت اعله ناره ومن برد حسته
طبع حبي عنب من اروى مرغوب سحر ينگـط مذاقي وناسي ماچــلته
مغتر من اطيح اموسم الحول حلاتي اتخر ورش گاع العشگ سكته
اطيحن صح اطيحن بس زبيب ابشيمة الگاع وعصير انا انگلب لوحبي يبسته
رطب شوگي الك شضن احشف لا ودري من اگــلك حــچــيــي چـــذبته
الرطب يگلب تمر من تچــبس اعليه وذا ا چــذاب گــلب هاي گوصرته
لك گدما احبك كبسلت بيك انضرب عگلي ابغرامك مسح ذاكرته
اتغطه ابلحف من يمر وكت الصيف وصيف من يمرني اشته
امسودن سوله بيه بس اوهوس بيك اشتترجه المسودن ينسه سالفته
هايم بلضهاري ابلبت الصيف وشگ ثوبي ابحرگتي التوني فصلته
ماهيس ابحمض ماهيس ابشوچ ولاناب الصريم ابرجلي هيسته
حافي انا وهفـــچ ممتحن بيك لچــول اشردت والعيب ماخفته
اخاف امن الشماته خافن اتشوف وجهي ورحت ضيعته
من تمشي بشر ضليت ماشوف ماشوفن بشر گدامي بس انته
چاليش اشردت رحت اسكن الچول چي حبك ابعيني وعيني فاضحته
اه وشچم اه ماينعدن الاه وشرد احسب اجروحي الگلبي عذبته
شفت منك عذاب ابلوعة الاه وغلگه ابجد رگلبي وهمي فورته
يفور الحزن بيه ويگلب اهموم وعرگه ابجلد صبري وبيه هدرته
وذا هيس بعد مااحمل النار اگول ايخف عذابي لون عاتبته
وتوصل للمعاتب ورد احاچيك تلوچ الساني صفنه وصفنه بالعته
وكشف غلگ گلبي كلشي مابيه الگه الجدر ناشف روحي شاربته
احضنت حبك جفن من يحضن العين مثل اضلوع گلبي اشلون حاضنته
ومن اتغيب عني ولو لحضات احن مثل اليتيم الشوك والدته
ااشگد لاموني گالوبالك ايخون وكل تعبك هدر ياخايب اتعبته
بارح ماوراه يمطر على الزرعات وبذرك وك عفه وعل الخالي اشتلته
ماچن اسمعت دگو وتد بلريح اذا يثبت وتدهم يعني اسمعته
الامن هل منازل صحت بلگوم وكل حجي الشماته ابشوگي حاربته
عفتها امن الاهل والناس والصحبان وجبت عمري ابغرامك نذر وذبحته
ماعندي بگه بس وجهي والجاه وعزة ماي وجهي وجاهي هم عفته
انچـــفه ماي الوجه من مرك العوز والجاه انزرف ويبوشل اتركته
ابراسي اشگد كرامه وعزة ايواد حنيت الراس والنوماس دنگــــته
كلها امحسبلها بس تخون اوياي هاذا احساب روحي الما محسبته
عمت عينك صلف يلبعت گلب اهواك بالله اشگال گلبك گلبي من بعته
الك رس اش الومك ودري دساس عرجك يل يرد الهند تارثـــته
يلتاكل چـــبد الحمزه ابو حزامين چالومك ابچبـــدي لون شرحته
اهوالحمزه ابقيانه چــبده ماچول اشوه انته الگلب هم زين من بعته
شفت عربيد افه امسنح ايلوج تشب نار الغضب بعيونه حاركته
تدغمث بلرمل غط راسه بلگاع وهي چــانت عشاير مامجابــــلـــته
وگف گام اعله حيله ابحرة اصواب خر طاح امچانه ومات هيسته
ماذل وبــچـه من ساعت المات بس عزة نفس بلروح كاتلته
تدنيت اعله هوني ارد اشوفه اشبيه مر زايع مرارة روحه جلبته
تدرون اشكتل عربيد الاسباع هيج (اعجــــــــيــــربه )امن الراس گارصته
الناس اتلومني من انكتل بيك مايدرون ضعف الذيب خاصرته
ليش اتخوني فهمني بس ليش شني ذنبي دگلي وجيب سالفته
چــي شجرة شبابي يبست اعليك چــي عنبر تشمني اكرهت سنبلته
ليش اتخوني چــي روحي تهواك چـــي كلبي ابغرامك ذبح ذابحته
ليش اتخوني فهمني بس ليش چـــي مرك سگم والروح بالعته
ليش اتخوني فهمني بس ليش چـــي ضيمك جمر وضلوعي حاملته
چــي طشيت عمري الخاطرك شوگ چـــي گلبي ابغرامك وذر وذرته
مويمي احلفت ماخون بلعباس وگلبك بيدي حلفته
صلف تكتل بشر والابله من هاي شلت تابوت روحه ورحت شيعته
والتكتلني عله اشلون الك عين رحت لهل الجنازه وتقره فاتحته
روح وداعتك ذاك العشگ راح وجرح گلبي الطفل من جرحك افطمته
وگلب گلبي الوگف بمحبتك ذيـــچ حسبته امن الكهف للموت نومته
البعت والما بعت صارالي لاشي اعشگت غيرك حلو بلدنيا ماشفته
ارجعت نادم وجر بذيالي خجلان الحبيبي الصار حيل اسنين فاركته
ارجعت لا الله تراني اتخبلت بيه عشكت الله ارجعت والدين قد سته
وچـــف الباع روحه وطالس الغير اگص چــفي وعلي لوبعد طالسته
تذكر من چـــنت احبك وخسرت ناس تذكر چـــم بشر بهواك شتمته
ارجعت للامو ومن گالو ايخون وكل واحد نصحني رحت باوسته
وتدري اتعلمت من الحياة اهواي وعضم بيها وجمل ماتعلمته
الي ايخون بيه ايخون بلغير الچـــــــلب يبگــــه چــــلب لوذهب طوگــــته
تحياتي الكل احبابي ال بلمنتدى اخواني والاخوات
اخوكم
جــــــروح ازمان
عدل سابقا من قبل جروح الزمان في الأربعاء أغسطس 24, 2011 12:06 am عدل 2 مرات
» شعر
» والدي الحبيب
» ابوذيات للحلوين
» دارمي يموت
» ترحيب
» ابو ذية
» فضل قراءة قل هو الله احد في ايام رجب
» بمناسبت قرب عيد رمضان المبارك
» انه بدونك طفل
» ابتسم
» غضل قراءة قل هو الله احد في ايام رجي
» شجرة دارمي كوم
» دارمي وقصته الحزينه..
» عضو جديد